المنبر الحر

المنبر الحر | مول الحانوت يناقش المساهمة المهنية

بقلم: الطيب آيت أباه

    دابا أنا مثلا دوّزت واحد ثلاثين عام في قطاع التجارة من أيّام الوالد الله يرحمو، وعندي سجل تجاري في عمرو واحد العشرين عام، وساهمت بالضرائب في بناء جزء من هاذ البلاد السعيدة، ودرت يدّ الله في دَوَران العجلة الاقتصادية، وتجنّدت مع شرفاء هاذ الوطن في سبيل استتباب الأمن الغذائي، واستثمرت جهد ثمين في الحفاظ على توازن القدرة الشرائية، ولكني كنت محروم من الاستفادة من صندوق الضمان الاجتماعي بموجب قانون صريح، واليوم جات المساهمة المهنية الموحدة، وأنا حاليا خارج المنظومة التجارية، لظروف خارجة عن إرادتي.. واش صافي ضربني التران؟

واخا، نقولو أنا حالة استثنائية! آشنو مصير الناس اللي ضاعت عليهوم هاذ الفرصة ومازال تايزاولو التجارة لحد الساعة، ولكن كبار في العمر؟ كيفاش غادين يقدرو يستافدو من التقاعد في إطار هاذ المساهمة المهنية الموحدة؟ بغض النظر عن التغطية الصحية! واش التاجر اللي شابْ ليه راسو وحجبانو في السوق يشوف شي وَريث يكتب ليه هاذ الوصية؟ ولا يحرم ولدو من إتمام المشوار التعليمي، كيفمّا وقع لعداد منا لظروف قاهرة، باش يستافد في بلاصتو؟ ولّا يوْهب الاستفادة من هاذ النظام لشي مساعد معاه؟

أكثر من هادشي كامل، آشنو المصير ديال واحد الجيش ديال النمل دايزة عليه الدكاكة في القطاع؟ هاذ النمل المتابر والمجتهد معروف في الضومين بـ”الْـگْـلّاسْ”، يعني المسيّر! هوما اللي تايخدمو 18 لساعة في النهار! عام مگـاجي في الحانوت، وعام ناشر رجليه في تمازيرت! خطرة تلقاه في مدينة أكادير وخطرات أخرين تجبرو في مدينة طنجة ولّا في الرباط ولّا في بني ملال، حسب الفرصة المتاحة! واش مثلا خاص مول المحل يديكلاري بهاذ ابن بطوطة في لاسينيسيس، ولا يقسم معاه الدوا ديال المرض في هاذ النظام؟ ولا يعفيه من احتساب هاذ المساهمة المهنية الموحدة، نهار لانڤونطير؟ حيث صاحب المحل هو اللي في سميتو هاذ المساهمة! أوْ لّا ربما يضيفوها للمصاريف ديال مدة التسيير؟

ها علاش خاص المتحدث بلسان التجار تكون دايزة عليه المحايْن، وعايش الحياة العميقة ديال مول الحانوت بأدق تفاصيلها، باش بحال هاذ البرامج تنزل بشكل سليم، وتجي على مقاس التجار بجميع شرائحهم وطبقاتهم الاجتماعية، ماشي غير أسّس تنظيم مهني واجمع فيه من هب ودب، وتلقّمُو بشباب متلّفين السّبرديلة، وتبدا تفاوض باسم الناس!

العجيب في الأمر، أن شي تنظيمات مهنية فيها موظفين متقاعدين، عايشين التّرف الاجتماعي، ومعطِيهُوم حق تمثيل مول الحانوت، وهوما في الأصل تايشكّلو ليه منافسة غير متكافئة في السوق، حيث مول الحانوت مطلوب منو يجبد كولشي من الحانوت، بينما الموظف المتقاعد اللي تايدافع على هاذ مول الحانوت، داير الحانوت غير خضرة فوق طعام!! إيوا فكّها يا منْ وحّلتِيها!!

صراحة، أنا مافهمتش كيفاش تنظيمات مهنية، طيلة الأزمة وهي تُصدر بيانات وبلاغات ومراسلات تتضمن مطلب إعفاء التجار من أداء الضرائب والجبايات في ظل الركود الذي تسبّبَت فيه الجائحة، واليوم ما بقى لهاذ التنظيمات المهنية غير تكري الطرونسبّور والدّقايقية باش تدِّي التجار لدار الضريبة من أجل أداء ضرائب كانت تصيح وتصرخ أنها فوق الطاقة!؟

شي فيلسوف يخرج يشرح لينا هاذ الشقلايْبَة والرّولاد 180 درجة، مع الإشارة طبعا، إلى أننا ماشي ضد الحماية الاجتماعية كفيمّا نادَى بها الملك، وماشي ضدّ الضرائب كواجب وطني، على الراس والعين، ولكننا ضدّ الضّدّ.

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

هذا الموقع يستخدم Akismet للحدّ من التعليقات المزعجة والغير مرغوبة. تعرّف على كيفية معالجة بيانات تعليقك.

مقالات ذات صلة

زر الذهاب إلى الأعلى